Stqarrija għall-Istampa | Fażi 1: Pjan ta’ Azzjoni għall-Konservazzjoni tal-Insett Nazzjonali

English Version

Introduzzjoni

Il-Fondazzjoni għall-Konservazzjoni tan-Naħla Maltija bi pjaċir qed tniedi konsultazzjoni komunitarja dwar il-Pjan ta’ Azzjoni propost tagħha għall-Konservazzjoni tal-Insett Nazzjonali. Din l-inizjattiva timmarka pass kruċjali fil-protezzjoni ta’ wieħed mit-teżori naturali uniċi u imprezzabbli ta’ Malta: Apis mellifera ruttneri, is-sottospeċi endemika tan-naħla tal-għasel li tinsab biss fil-Gżejjer Maltin. Dan il-pjan ta’ azzjoni huwa proġett indipendenti mmexxi biss mill-Fondazzjoni, mingħajr ebda involviment estern.

Għaliex in-Naħla tal-Għasel Maltija hija Importanti

In-naħla tal-għasel (Apis mellifera) hija indiġena għal Malta; madankollu, in-Naħla Maltija (Apis mellifera ruttneri) hija sottospeċi distinta li evolviet b’mod iżolat għal eluf ta’ snin, u dan jagħmilha unika għall-arċipelagu Malti. Adattata perfettament għall-klima u l-ekosistemi ta’ Malta, għandha rwol vitali fid-dakra lokali, tissapportja l-agrikoltura, u tikkontribwixxi b’mod sinifikanti għall-produzzjoni tal-għasel, billi hija marbuta profondament mal-wirt ta’ Malta.

Madankollu, din in-naħla endemika qed tiffaċċja theddida serja mit-taħlit kkawżat mill-importazzjoni ta’ razez barranin tan-naħal tal-għasel. Dawn in-naħal importati jitgħammru mas-sottospeċi Maltija, li jirriżulta f’taħlit ġenetiku li qed inaqqar il-karatteristiċi uniċi tagħha. Dan it-telf gradwali tal-identità ġenetika jhedded is-sopravivenza u r-reżiljenza tas-sottospeċi fl-abitati lokali.

Il-protezzjoni tan-Naħla Maltija hija speċjalment vitali fil-kuntest tat-tibdil fil-klima. L-adattament lokali tas-sottospeċi jagħmilha mgħammra aħjar biex tlaħħaq ma’ stress ambjentali bħal varjazzjonijiet fit-temperatura u nixfa. It-telf ta’ din ir-riżorsa ġenetika jnaqqas il-bijodiversità u jdgħajjef ir-reżiljenza ekoloġika ta’ Malta.

Dwar il-Fondazzjoni

Il-Fondazzjoni għall-Konservazzjoni tan-Naħla Maltija hija ddedikata għall-protezzjoni u l-promozzjoni tal-Apis mellifera ruttneri. Il-missjoni primarja tagħha hija li tifformula u timplimenta pjan ta’ azzjoni komprensiv li jikkoordina l-isforzi ta’ konservazzjoni madwar Malta.

Filwaqt li l-Fondazzjoni għadha fil-bidu tagħha, issa wasal iż-żmien li jiġu fformalizzati u kkonsolidati l-isforzi kollha mwettqa s’issa, u l-inizjattivi futuri, fi pjan ta’ azzjoni li jservi bħala qafas ta’ gwida.

Missjoni

Il-missjoni ta’ dan il-Pjan ta’ Azzjoni hija li tissalvagwardja n-Naħla Maltija billi tistabbilixxi qafas ikkoordinat u bbażat fuq l-evidenza li jipproteġi l-integrità ġenetika tagħha, jippromwovi t-trobbija tan-naħal sostenibbli, u jqajjem kuxjenza nazzjonali dwar l-importanza tagħha.

Għanijiet tal-Pjan ta’ Azzjoni bbażati fuq il-Prinċipji tal-Fondazzjoni

• Biex titqajjem kuxjenza dwar is-sinifikat tan-Naħla Maltija għall-ambjent naturali ta’ Malta, is-settur tal-apikultura, u l-agrikoltura.
• Li tiġi enfasizzata n-Naħla Maltija bħala parti vitali mill-wirt naturali ta’ Malta, li jistħoqqilha sforzi komprensivi ta’ konservazzjoni.
• Li tiġi promossa l-għarfien, ir-riċerka, u t-tnissil relatat man-Naħla endemika Maltija.
• Li jingħaqdu u jiġu kkoordinati individwi, organizzazzjonijiet, u entitajiet mhux governattivi interessati fil-konservazzjoni tan-Naħla Maltija.
• Li jiġi mfassal pjan komprensiv li jiżgura l-protezzjoni olistika tan-Naħla Maltija.

Kif Tipparteċipa

Jekk jogħġbok imla l-mistoqsijiet ta’ hawn isfel u ibgħat il-kummenti tiegħek permezz tal-formola pprovduta, flimkien mad-dettalji personali tiegħek. L-iskadenza għas-sottomissjonijiet hija t-30 ta’ Settembru 2025.

Mistoqsijiet tal-Konsultazzjoni Komunitarja

Il-Fondazzjoni tistieden lill-komunità biex taqsam il-fehmiet u tikkontribwixxi għat-tiswir ta’ din l-inizjattiva vitali. Nilqgħu kummenti konkret dwar kif jistgħu jintlaħqu l-għanijiet tal-Pjan t’Azzjoni tal-Fondazzjoni, b’mod partikolari billi jiġu indirizzaw il-mistoqsijie li ġejjin:

Dokumenti

1. In-Naħla Maltija hi Protetta?
2. Benefiċċji tan-Naħla Maltija fl-Apikultura
3. Insett Uniku: In-Naħla Maltija
4. Reviżjoni tal-Liġijiet Maltin u Ewropej relatati mal-Protezzjoni Ġenetika tan-Naħla Endemika Maltija (Apis mellifera ruttneri)

Biex tibqa’ aġġornat dwar il-ħidma tal-Fondazzjoni, nistednuk biex tingħaqad mal-komunità WhatsApp tagħna. Il-funzjonament bla xkiel tal-organizzazzjoni tagħna jiddependi fuq riżorsi finanzjarji, u l-appoġġ tiegħek huwa essenzjali. Kull kontribuzzjoni, irrispettivament mid-daqs, tagħmel differenza reali fl-avvanz tal-missjoni tagħna. Tista’ tgħin billi tingħaqad mal-kawża tal-Fondazzjoni, issir sostenitur għal €10 biss fis-sena jew agħmel donazzjoni hawn: Appoġġja l-Fondazzjoni.